Þjónusta félagsins >>
Styrkir >>
Starfsfólk >>
Fundargerðir >>
Tengdir vefir >>
Kynningarmál >>
Samþykktir Atvinnuþróunarfélags Suðurlands
Markmið og hlutverk
1.1
Atvinnuþróunarfélag Suðurlands, skammstafað AÞS, er byggðasamlag sveitarfélaga á Suðurlandi og í Vestmannaeyjum í samræmi við ákvæði sveitarstjórnarlaga nr. 45/1998. Heimili AÞS og varnarþing er að Austurvegi 56 á Selfossi.
1.2
Markmið atvinnuþróunarfélagsins eru:
- að veita einstaklingum, fyrirtækjum, stofnunum og sveitarfélögum rekstrarráðgjöf varðandi rekstur viðkomandi,
- að veita styrki til verkefna á starfssvæði félagsins ,
- að vinna að þróunarverkefnum fyrir starfssvæðið allt og einstaka hluta þess,
- að vinna að eflingu atvinnu- og athafnalífs á starfssvæði félagsins
- að vinna að verkefnum á sviði atvinnu- og athafnalífs sem tengjast stefnu stjórnvalda á starfssvæðinu.
Um aðalfund og félagsfundi AÞS
2.1
Aðalfund AÞS skal halda fyrir lok októbermánaðar ár hvert á ársþingi Samtaka sunnlenskra sveitarfélaga. Á kosningaári sveitarstjórna skal halda hann að loknum kosningum en þó eigi síðar en 15. september. Yfirumsjón og formlegur undirbúningur ársþings er í höndum stjórnar SASS.
2.2
Félagafund skal boða ef þörf krefur að mati stjórnar eða ef þriðjungur aðildarsveitarfélaga krefst þess skriflega. Sömu reglur gilda um þá og reglulega aðalfundi.
2.3
Stjórn AÞS semur dagskrá aðalfundar og skal hún send þingfulltrúum eigi síðar en tveimur vikum fyrir aðalfundinn og skulu aðildarsveitarfélög hafa tilkynnt um fulltrúa á aðalfund fyrir þann tíma. Með aðalfundarboði skal senda tillögu að fjárhagsáætlun næsta árs, endurskoðaða ársreikninga, ársskýrslu stjórnar AÞS, skýrslur starfsnefnda, tillögur stjórnar og tillögur sem borist hafa frá aðildarsveitarfélögunum.
2.4
Aðalfundur mótar stefnu AÞS og ákveður hvaða málaflokka skuli lögð áhersla á fram að næsta aðalfundi.
Á aðalfundi er afgreidd skýrsla um liðið starfsár, endurskoðaðir reikningar og tillaga að fjárhagsáætlun og gjaldskrá fyrir næsta ár. Stjórn félagsins skal kosin, skoðunarmenn kosnir og umræður og atkvæðagreiðslur um önnur mál, sem löglega eru upp borin.
2.5
Tillögur og ályktanir sem hljóta eiga afgreiðslu á aðalfundi skal senda stjórn 3 vikum fyrir aðalfund. Enga ályktun eða tillögu má bera upp til samþykktar, nema hún hafi verið kynnt með fundarboði á fundinn.
2.4.
Félagsfundur er lögmætur ef viðstaddir eru svo margir eigendur eða umboðsmenn þeirra að nái helmingi lögmætra fulltrúa, enda hafi fundurinn verið löglega boðaður.
Um kosningar til aðalfundar AÞS
3.1
Á aðalfundi AÞS eiga sæti:
a. Einn fulltrúi fyrir sveitarfélag sem hefur 200 íbúa eða færri.
b. Tveir fulltrúar fyrir sveitarfélag sem hefur 201 til 500 íbúa.
c. Þrír fulltrúar fyrir sveitarfélag sem hefur 501 til 1000 íbúa
d. Sveitarfélag með yfir 1000 íbúa skal auk þess fá einn fulltrúa fyrir hvert byrjað þúsund íbúa.
e. Stjórnarmenn AÞS og framkvæmdastjórar aðildarsveitarfélaga með málfrelsi og tillögurétti séu þeir ekki kjörnir fulltrúar.
Miða skal við íbúafjölda sveitarfélags þann 1. desember næstliðins árs.
3.2
Kjörgengir eru framkvæmdastjórar sveitarfélaga, sveitarstjórnarmenn og varamenn þeirra. Sveitarstjórnarmaður missir kjörgengi sitt á næsta aðalfundi eftir að hann hættir setu í sveitarstjórn. Umboð eða kjörbréf til þess að sækja félagafundi og fara þar með atkvæði umbjóðanda skal vera skriflegt.
3.3
Aðalfundurinn er opinn öllum sveitarstjórnarmönnum aðildarsveitar-félaganna sem áheyrnarfulltrúum.
Um kosningar á aðalfundi AÞS
4.1
Á aðalfundi ræður einfaldur meirihluti atkvæða. Samþykktum byggðasamlagsins verður þó aðeins breytt á aðalfundi með samþykki 2/3 hluta aðildarsveitarfélaga.
4.2
Á aðalfundi skal kosin 5 manna stjórn félagsins. Samkvæmt tilnefningu skulu stjórnarmenn kosnir þannig úr þeim hópi manna sem eru kjörgengir skv. gr. 3.2.; 3 úr Árnessýslu, 1 úr Rangárvallasýslu og Vestur-Skaftafellssýslu og 1 úr Vestmannaeyjum. Jafnmargir skulu kosnir til vara af hverju svæði. Aðalfundur kýs beinni kosningu formann og varaformann stjórnarinnar úr þessum hópi. Enginn skal eiga sæti lengur en 6 ár samfellt í stjórn.
4.3
Aðalfundur skal kjósa tvo skoðunarmenn ársreikninga og tvo til vara. Skulu þeir yfirfara og árita ársreikninga AÞS.
4.4
Aðalfundur kýs starfsnefndir fundarins og menn í starfsnefndir sem starfa að ákveðnum málefnum milli funda, samkvæmt sérstakri samþykkt aðalfundarins.
4.5
Fundargerðir og fundarsamþykktir aðalfundar skal færa í sérstaka gerðabók og jafnframt gerð grein fyrir öðru því sem gerist á aðalfundi. Fundargerð skal lesin upp í fundarlok og borin undir atkvæði ef þess er kostur en heimilt er að fela fundarstjóra og fundarritara að ganga frá fundargerðinni. Setja skal AÞS sérstök aðalfundarsköp sem aðalfundur þarf að samþykkja.
Um stjórn og starfslið
5.1
Stjórnin er málsvari félagsins á milli aðalfunda og fylgir fram samþykktum stjórnarfunda og aðalfundar. Stjórnin vinnur að stefnumarkandi málum og gerir tillögur um ný mál, er leggja skal fyrir aðalfund til ákvörðunar. Stjórn AÞS fer jafnframt með yfirstjórn á rekstri félagsins og ber ábyrgð á að rekstur sé innan þeirra fjárheimilda sem aðalfundur AÞS hefur samþykkt.
5.2
Stjórnarfundi skal halda eftir þörfum en eigi sjaldnar en 6 sinnum á ári og er stjórnarfundur lögmætur sé helmingur kjörinna fulltrúa mættur.
5.3
Stjórn félagsins ræður framkvæmdastjóra, markar starfssvið hans og launakjör og gerir við hann skriflegan ráðningarsamning. Aðra starfsmenn ræður framkvæmdastjóri AÞS og leitar staðfestingu stjórnar. Heimild stjórnar AÞS þarf að liggja fyrir ef um fjölgun stöðugilda er að ræða. Um starfskjör starfsmanna AÞS fer samkvæmt ákvæðum kjarasamninga og ráðningarsamnings.
5.4
Framkvæmdastjóri veitir AÞS forstöðu og annast framkvæmd málefna þess eftir því sem stjórn ákveður og hefur á hendi reikningsskil, fjármálastjórn og starfsmannastjórn. Framkvæmdastjóri á sæti á aðalfundi og stjórnarfundum AÞS.
5.5
Framkvæmdastjóri skal að jafnaði boða stjórnar- og nefndafundi í samráði við formann stjórnar eða nefndar. Telji formaður stjórnar eða nefndar að óeðlilegur dráttur sé á fundarboðun, getur hann hlutast til um fundarboðunina. Framkvæmdastjóra er skylt að leggja fyrir stjórn öll meiri háttar erindi og nýmæli.
5.6
Starfsmannastefna sem snýr að fagsviði AÞS skal unnin og staðfest af stjórn félagsins telji hún þörf á slíkri stefnu. Framkvæmdastjóri AÞS ber ábyrgð á að starfsmanna- og launastefnu verði fylgt.
Um árgjöld
6.1
Aðildarsveitarfélög AÞS skulu árlega verja 0,50% af útsvars- og fasteignaskattstekjum sínum til AÞS og skal miða við tekjur sveitarfélaganna eins og þær voru tveimur árum fyrir greiðslutímabil.
Um aðild, úrsögn og slit
7.1
Sækist sveitarfélag eftir aðild að AÞS skal það senda umsókn til stjórnar eigi síðar en mánuði fyrir aðalfund og skal leggja umsóknina fyrir aðalfund. Meirihluta atkvæða þarf fyrir samþykki um aðild. Ef umsókn um aðild er samþykkt skal hún taka gildi næstu mánaðarmót eftir aðalfund. Árgjöld sbr. grein 6.1. í samþykktum þessum skulu þá greiðast í réttu hlutfalli við þann mánaðarfjölda sem eftir lifir á því ári sem sveitarfélagið fær aðild.
7.2
Sveitarfélag sem hefur fengið samþykkta aðild að AÞS skal hefja greiðslur til AÞS næsta mánuð eftir að umsókn hefur verið samþykkt.
7.3
Kjósi sveitarfélag að hætta þátttöku í AÞS, skal tilkynna það stjórninni eigi síðar en mánuði fyrir aðalfund og taki úrsögnin gildi um næstu áramót á eftir. Á kosningaári skal úrsögn tilkynnast fyrir 1. júlí. Við úrsögn skal reikna út eignarhlut eða skuld sveitarfélags í AÞS. Greiðsla til sveitarfélags, eða frá sveitarfélagi, skal vera í hlutfalli við íbúafjölda. Forsendur lokauppgjörs skulu liggja fyrir innan 12 mánaða frá því úrsögn tók gildi. Hætti sveitarfélag þátttöku í AÞS þá skal jafnframt fara fram endurskoðun á samþykktum þessum. Um úrsögn að öðru leyti fer samkvæmt ákvæðum 84. gr. sveitarstjórnarlaga nr. 45/1998.
7.4
AÞS verður ekki lagt niður nema tveir löglega boðaðir félagafundir samþykki það með 2/3 hluta atkvæða. Fundirnir skulu haldnir með a.m.k. tveggja mánaða millibili. Tillaga að félagsslitum skal fylgja fundarboði. Áður en seinni fundurinn er haldinn skal afstaða aðildarsveitarfélaga til félagsslitanna liggja fyrir. Til þess að slit á AÞS nái fram að ganga þurfa 2/3 hlutar sveitarstjórna aðildarsveitarfélaga að staðfesta þau.
7.5
Sveitarfélag sem gerist aðili að AÞS eftir 1. janúar 2006 greiðir til AÞS sambærilegt framlag núverandi aðildarsveitarfélaga. Þá greiði hið nýja aðildarsveitarfélag viðbótarframlag til reksturs AÞS til þess að jafna heildarframlög þau er sveitarfélög sem aðild eiga fyrir 1. janúar 2006 hafa þá innt af hendi og varið verður til rekstursins. Viðbótarframlag hins nýja aðildarsveitarfélags skal reiknað út frá fjármagnstekjum líðandi árs og íbúafjölda aðildarsveitarfélaga.
7.6
Óski sveitarfélag sem gerist aðili að AÞS skv. grein 7.5 eftir því að verða fullgildur eignaraðili að eigin fé AÞS ber því að greiða, hlutfall af eigin fé AÞS m.v. íbúafjölda, hvort tveggja eins og það stóð um síðustu áramót fyrir inngöngu. Til frádráttar komi þá þegar greitt viðbótarframlag.
Um breytingar á samþykktum og gildistökuákvæði
8.1
Breyta má samþykktum þessum á aðalfundi ár hvert eða löglega boðuðum félagafundi og skulu tillögur um breytingar á samþykktum fylgja fundarboði. Tillögur til breytinga á samþykktum skulu sendar stjórn þremur vikum fyrir aðalfund.
8.2
Breyting á samþykktum telst samþykkt, ef hún nýtur stuðnings 2/3 hluta þingfulltrúa á lögmætum aðalfundi.
8.3
Samþykktir þessar öðlast gildi við samþykki þeirra.
Ákvæði til bráðabirgða samþykkt á auka aðalfundi 19. desember 2008
Þrátt fyrir ákvæði greinar 6.1 skulu Aðildarsveitarfélög AÞS verja 0,4% af útsvars- og fasteignatekjum sínum til AÞS á árunum 2009 og 2010.
Ákvæði til bráðabirgða samþykkt á aðalfundi 15. október 2009
Þrátt fyrir ákvæði greinar 6.1 og ákvæði til bráðabirgða samþykkt á auka aðalfundi 19. desember 2008 skulu Aðildarfélög AÞS að frátöldum Vestmannaeyjabæ ekki greiða árgjöld til AÞS á árinu 2010. Vestmannaeyjabær greiðir skv. fyrrgreindu bráðabirgðaákvæði 0,4% af útsvars- og fasteignatekjum sínum. Jafnframt greiði Vestmannaeyjabær viðbótarframlag skv. grein 7.5.
Ákvæði til bráðabirgða samþykkt á aðalfundi 13. september 2010
Þrátt fyrir ákvæði greinar 6.1 skulu Aðildarsveitarfélög AÞS verja 0,25% af útsvars- og fasteignatekjum sínum til AÞS á árinu 2011.
Þannig samþykkt á aðalfundi Atvinnuþróunarfélags Suðurlands þann 13. september 2010.
