Atvinnuþróunarfélag Suðurlands - Fréttir

 

 

 

 

Markaðsstofan er samstarfsverkefni sveitarfélaga og fyrirtækja á svæðinu sem stofnað var til í því skyni að efla markaðs- og kynningarstarf um Suðurland. Markmið hennar er að auka atvinnustarfsemi og umsvif í ferðaþjónustu með auknum fjölda ferðamanna inn á svæðið. Davíð bendir á að Suðurlandið er sá landshluti sem flestir ferðamenn heimsækja enda skartar svæðið einstaklega fjölbreyttri náttúru, sögu og menningu. Svæðið er víðfeðmt en það teygir sig frá Selvogi í vestri og alla leið að Höfn í Hornafirði í austri og þar er einn mesti fjöldi ferðaþjónustufyrirtækja sem fyrirfinnst í einum landshluta.

 

„Í kjölfar eldsumbrotanna hafa enn fleiri fyrirtæki komið inn á markaðinn hér og fjölbreytni í alls kyns afþreyingu hefur aukist til muna.“ Davíð nefnir sem dæmi ný fyrirtæki sem tengjast hestamennsku, útivist og matarmenningu. Þar á meðal eru bæði fyrirtæki sem leggja áherslu á útreiðar um víðerni og göngur um jökla og fyrirtæki sem leigja út hvers kyns frístundatæki eins og snjósleða og fjórhjól. Þannig er nú hægt að komast í fjórhjólaferðir í Skaftárhreppi og um ríki Vatnajökuls á svæðinu við Hoffellsjökul. Vatnajökulsþjóðgarður hefur gríðarlega mikið að bjóða og þar er rekin öflug ferðaþjónusta allt árið. Leiðirnar inn á Fjallabak og hálendið liggja um Rangárþing, m.a. upp af Hvolsvelli, og jarðvangurinn í kringum Kötlu og Eyjafjallajökul á eftir að verða því svæði mikil lyftistöng.

Suðurland er líka ein stærsta matarkista landsins og mikil tækifæri fólgin í ferðum sem tengjast matarupplifun og framleiðslu og beinni sölu alls kyns matvæla og minjagripa af því tagi. „Ekkert tengir minninguna um vel heppnaða ferð betur en bragðið af heiðagengnu lambi eða ferskum humri úr sjó“ segir Davíð kankvís og viss í sinni sök.

Suðurströndin er mikið gósenland fyrir þá sem hafa áhuga á fuglaskoðun. Fyrsti viðkomustaður farfuglanna er einmitt á þessum slóðum og þar má oft rekast á fágæta fugla sem hafa flækst til landsins með háloftavindum. Einn þessara staða er Ingólfshöfði en yfir sumarmánuðina eru einmitt skipulagðar fuglaskoðunarferðir í höfðann. „Það er tvímælalaust hægt að mæla með því að fólk gefi sér góðan tíma til að skoða náttúruna og dýralífið,“ segir Davíð. Við ströndina eru líka ótal aðrir möguleikar tengdir sjóðstangaveiði, strandveiði, fiskmarkaðir, siglingar og brimbretti.

Ferðafólki gefst áfram tækifæri til að skoða orkuverin á Hellisheiði og á Laugarvatni er starfrækt hellaskoðunarfyrirtæki auk fyrirtækja sem bjóða upp á hvers kyns afþreyingu sem öll fjölskyldan getur tekið þátt í. Davíð segir móttöku ferðamanna á íslenskum sveitaheimilum hafa færst talsvert í vöxt en þá opna heimamenn heimili sín fyrir ferðafólki og þeim gefst tækifæri til að upplifa íslenska heimilisstemmingu.

Upplýsingar um þá fjölbreyttu afþreyingarmöguleika sem er að finna á Suðurlandi er hægt að nálgast í fjölda upplýsingamiðstöðva sem starfræktar eru á svæðinu. „Við leggjum áherslu á að möguleikar til afþreyingar eru mjög fjölbreyttir og það geta allir fundið eitthvað við sitt hæfi á Suðurlandi,“segir Davíð, en Markaðsstofa Suðurlands heldur einnig úti upplýsingaveitu á netinu á slóðinni: www.south.is og www.markadsstofa.is 

 

Að sögn Davíðs liggur styrkur ferðaþjónustunnar á Suðurlandi í því að stærstur hluti svæðisins er aðgengilegur allan ársins hring og mikilvægar samgönguumbætur hafa stytt vegalengdir til muna.

„Undanfarin ár hafa mildir vetrar unnið með okkur en einnig er búið að byggja upp fleiri vegi eins og nýja Gjábakkaveginn sem styttir leiðina að Gullfossi og Geysi umtalsvert. Nú tekur það ekki nema rúman hálftíma að aka frá Reykjavík að Geysi um Gjábakkaveg.“

Talsverð eftirvænting er einnig bundin við opnun Suðurstrandarvegarins. Tilkoma hans breytir miklu og bætir aðgengi að svæðinu við Selvog og Herdísarvík á Reykjanesi. Suðurstrandarvegurinn greiðir Sunnlendingum leið til Keflavíkur og gerir þeim sem koma til landsins kleift að aka beint frá flugvellinum í Keflavík inn á Suðurland án þess að þurfa að fara í gegnum umferðamannvirkin og allar slaufurnar í Reykjavík.

„Svæðið sem Suðurstrandavegur opnar er gríðarlega fallegt og að mínu viti eitt best varðveitta leyndarmálið í nágrenni höfuðborgarinnar. Þarna er mikið af minjum sem tengjast atvinnusögu okkar eins og til dæmis útróðrasvæðin við Selvog og víðar.“

 

Að mati Davíðs er brýnt að ljúka breikkun Suðurlandsvegar en eftir jarðgangagerð og vegabætur í öðrum fjórðungum hljóti röðin að vera komin að Suðurlandi. Umferðarþunginn er hvað mestur á suðvesturhorninu og mikilvægt að það svæði sitji ekki eftir í vegabótum. Þá þurfi að huga að gerð hjólreiðastíga enda sé bagalegt að ferðamenn sem hingað koma og vilja hjóla milli byggðalaga skuli ekki hafa önnur úrræði en að fara inn á þungar umferðaræðar. „Það hefur verið staðið myndarlega að uppbyggingu reiðvega á Suðurlandi og nú er brýnt að byggja upp hjólreiðastíga líka.“

Davíð segir að eftir að flugfélagið Ernir tók að fljúga til Hafnar í Hornafirði tvisvar á dag hafi orðið mikil breyting og tenging Hafnar við höfuðborgarsvæðið hafi gjörbreyst.

„Það skiptir miklu að nú geta ferðamenn skroppið í dagsferðir í Hornafjörð og fyrir heimamenn er það mikil samgöngubót að geta skotist í höfuðborgina og komist heim samdægurs.“

 

Þrátt fyrir mannvirkin öll og fjölbreytta flóru afþreyingarmöguleika á Suðurlandi er mesta sérstaðan þó e.t.v. fólgin í þeirri auðlegð sem landið lagði með með sér sjálft.

„Þeir sem hingað koma eru oft að sækjast eftir því sem þeir hafa ekki greiðan aðgang að annars staðar. Það má ekki gleymast að ósnortin náttúra, kyrrð og ró, Norðurljós og ómengað skin af stjörnubjörtum himni er á meðal þess sem margir sækjast eftir hér vegna þess að þeir hafa ekki aðgang að því heima hjá sér lengur. Það hygg ég að liggi mikilvægur en vanmetinn vaxtarbroddur í íslenski ferðaþjónustu í dag“ segir Davíð Samúelsson að lokum.